日文嘅 4、7、9 要咁數？順數「音讀」倒數「訓讀」！

【 日文嘅 4、7、9 要咁數？順數「音讀」倒數「訓讀」！】
日文嘅「四」、「七」同「九」都有兩個音，上堂嗰陣先生實話多數讀「よん」（yon）「なな」（nana）「きゅう」（kyu）。現實生活，好多時又會聽到日本人用「し」（shi）「しち」（shichi）同「く」（ku），到底係點分嘅呢？
我哋平時講開嘅「いち」（ichi）、「に」（ni），「さん」（san），其實係「 #音讀 」，即係漢音讀法。「一至十」全部以「音讀」嘅話就係：
一（いち・ichi）、二（に・ni）、三（さん・san）、四（し・shi）、五（ご・go）、六（ろく・roku）、七（しち・shichi）、八（はち・hachi）、九（く・ku 或 きゅう・kyu）、十（じゅう・ju）
係咪同廣東話發音好似呢？
咁全部用「 #訓讀 」，即係日本自己嘅原有發音，又係點呢？
一（ひと・hito）、二（ふた・futa）、三（み・mi）、四（よ・yo）、五（いつ・itsu）、六（む・mu）、七（なな・nana）、八（や・ya）、九（ここの・kokono）、十（とお・to）
原來就係嗰堆響《大家的日本語》第11課背到頭都爆嘅數字。
講番現代人習慣問題。
由於大家都習慣以「音讀」數數字，所以由一字順數去大數字，
4、7、9通常都會讀成「し」（shi）「しち」（shichi）同「く」（ku），不過如果係由大數目倒數番去一，由於「し」、「しち」同「く」發音比較含糊，撈埋其他數字容易混淆，所以就會用訓讀嘅「よん」（yon）「なな」（nana）取代。
至於電話號碼呀、年齡資料等等，
為免對方聽錯，通常都會用番訓讀講㗎～